2 Keunenks 02
01Tied was ter heer dat de HEER Elia in n störm opnemen zol. Elia en Elisa wollen net oet Gilgal votgoan,
02dou Elia tegen Elisa zee: "Blief doe toch hier! De HEER stuurt mie noar Betel tou." Elisa zee: "Zo woar as de HEER leeft en zo woar as ie leven, ik loat joe zekerwoar nait allenneg goan!" Dat zodounde gingen ze mit heur baaident op pad noar Betel.
03Profeten oet Betel kwammen Elisa tou stad oet in muit. "Heb ie wel begrepen," zeden ze, "dat de HEER vandoag joen meester van joe ofnemen zel?" "Joa, wis!" zee e. "Stil mor!"
04Elia zee tegen Elisa: "Blief doe toch hier! De HEER stuurt mie noar Jericho tou." Elisa antwoordde: "Zo woar as de HEER leeft en zo woar as ie leven, ik loat joe zekerwoar nait allenneg goan!" Dat zodounde gingen ze mit heur baaident op pad noar Jericho.
05Profeten oet Jericho kwammen Elisa in muit. "Heb ie wel begrepen," zeden ze, "dat de HEER vandoag joen meester van joe ofnemen zel?" "Joa, wis!" zee e. "Stil mor!"
06Elia zee tegen Elisa: "Blief doe toch hier! De HEER stuurt mie noar Jordaan tou." Elisa antwoordde: "Zo woar as de HEER leeft en zo woar as ie leven, ik loat joe zekerwoar nait allenneg goan!" Zo gingen ze mit heur baaident wieder.
07Bie Jordaan bleven ze stoan. Fiefteg profeten dij heur achternoakommen wazzen, bleven op n ofstandje stoan te kieken.
08Elia dee zien mantel òf, vòlde hom op en sluig der mit op t wotter. Dat stroomde weerskanten op, dat zai konden mit heur baaident mit dreuge vouten aan aanderkaant kommen.
09In tied dat ze overstoken, vruig Elia aan Elisa: "Wat wilst nog geern dat ik veur die dou veur ik van die ofnomen wor? Zeg t mor!" Elisa antwoordde: "Ik zol geern n dubbeld paart van joen gaist hebben willen."
10 "Vragst wat slim stoers!" zee Elia. "Mor astoe der getuge van bist hou of ik van die votnomen wor, den zelst dien zin kriegen. Aans nait."
11 Aal proatend laipen ze wieder. Dou werden ze in ainen van nkander schaaiden deur n woagen van vuur mit peerden van vuur. Zo wer Elia in n störm mitvoerd noar hemel.
12 Elisa zag t gebeuren en raip: "Voader, voader! Striedwoagen en peervolk van Israël!" Dou e Elia nait meer zain kon, scheurde hai zien klaaier middendeur.
13 Hai pakte Elia zien mantel op dij ofgleden was, laip weerom en bleef aan kaant van Jordaan stoan.
14 Hai sluig mit Elia zien mantel op t wotter en raip: "Woar hol ie toch tou, HEER, God van Elia?" Weer sluig e op t wotter en vannijs stroomde t weerskanten op, dat Elisa oversteken kon.
15 Profeten oet Jericho dij Elisa van overkaant òf in t oog huilen, zeden tegen nkander: "Elia zien gaist is op Elisa overgoan." Ze kwammen hom in muit en gingen veur hom op knijen.
16 "Wie hebben fiefteg flinke kerels bie ons," zeden ze, "loat dij noar joen meester op zuik goan. Ie waiten mor nooit of de gaist van HEER hom nait optild het en woaraarns op n baarg of in n leegte deelzet." "Nee," zee Elisa, "nait doun!"
17 Mor dou ze aandringen bleven, op t onbeschoamde òf, zee e op t lest: "Nou, tou den mor!" Fiefteg man staark werden der dou op oetstuurd en dij zöchten drij doag, mor aal wèl ze vonden, Elia nait.
18 Dou ze bie Elisa in Jericho weeromkwammen, zee e tegen heur: "Ik haar joe toch zegd: 'Nait doun!'"
19 Lu van Jericho zeden tegen Elisa: "Ie waiten, t is goud verkeren in dizze stad, mor t wotter is verkeerd en t laand brengt misgeboortes teweeg."
20 "Breng mie n schuddel," zee Elisa. "n Nije, en dou der wat zolt in." Dat deden ze.
21 Elisa ging der mit noar wotterwèl tou en streude doar zolt in. "Dit zegt de HEER," zee e, "ik zuver dit wotter. Der kommen gain staarfgevallen en misgeboortes meer van!"
22 En tot vandoag aan dag tou is t wotter doar zuver, krekt as Elisa zegd haar.
23 Van Jericho ging Elisa noar Betel tou. Dou hai omhoog laip noar stad tou, runde doar n haile koppel leujonges op hom òf. Ze scheerden hom de gek aan en raipen: "Zet hom op, koale! Zet hom op, koale!"
24 Elisa draaide zok om en dou e leujonges gewoar wer, vervlökte hai heur in noam van de HEER. En mit kwammen der twij beren tou t bos oet dij twijenvatteg van dij kinder verropten.
25 Van Betel trok Elisa noar Karmelbaarg tou en doarvandoan ging e noar Samaria weerom.
|
